Átti einstaklega skemmtilega helgi með góðum vinum. 4/5 af gamla stofngengi vinafélagsins Gaursins efndi til sumarbústaðarhittings 10 árum eftir síðasta hitting. Fjórar fjölskyldur komu saman við Þingvallavatn, átta fullorðnir og tíu börn á aldrinum 2-8 ára. Fjölskyldan sem vantaði er af stærðinni 2+2, þannig að í raun er vinafélagið Gaurinn orðinn samtals tíu fullorðnir og tólf börn. En nóg af stærðfræði. 

... beinst framhald úr síðasta bloggi.

- sváfum úr okkur ferðaþreytuna hjá Hillu í Hafnarfirðinum
- skoðuðum íbúð þegar við vöknuðum og þegar ég skoðaði tölvupóstinn minn sá ég að fyrsta ljósmyndaverkefnið mitt var í höfn
- sendum drengina í Fellabæinn, fastsettum okkur íbúð í Hafnarfirði og fluttum inn með 4 ferðatöskur
- settum fötin inn í skáp, pökkuðum aftur niður og brugðum okkur í ferðalag
- tók fyrsta brúðkaupið mitt með hjálp Hreiðars, hitti ættingja og vini á Norðurlandi
- skelltum okkur svo austur að hitta fleiri ættingja en drengirnir voru síður en svo ánægðir að sjá okkur, en þeir sættust á veru okkar þegar þeir komust að því að þeir máttu vera lengur og við skildum þá eftir á ný
- fórum aftur norður og réðumst á bílskúrinn, fluttum með hjálp góðra manna allt sem hægt var að koma í einn sendibíl, einn pallbíl og kerru.
- hentum draslinu inn og röðuðum kössum hingað og þangað um íbúðina. Gerðum barnaherbergið tilbúið og fengum svo drengina heim með flugi.
- héldum áfram að reyna að koma okkur fyrir og skelltum okkur svo á ættarmót á Reykhólum
- aftur í bæinn og ég kláraði að vinna brúðkaupið og svo var brunað austur á land á ný.
- fór í brúðkaup hjá Dagmar og Ninna, náði flottum myndum og skemmti mér konunglega
- dvöldum í íbúð Sigga bró og drengirnir fengu að sofa í tjaldi, inni!
- heimsóttum mann og annan og nutum þess að vera á Héraði
- átti 10 ára brúðkaupsafmæli og dagurinn fór í að bruna lengri leiðina til Þórshafnar og steinhreinsa ein fimm kíló af vínberjum
- gistum á hinu glæsilega Hótel Jórvík á Þórshöfn með vel útilátnum morgunverði aðeins neðar í götunni
- fórum í skemmtilegt og brúðkaup Grétu og Jóns Arnars og fjörugt hlöðuball. Náði fullt af skemmtilegum römmum.
- brunuðum svo í einum rykk til Reykjavíkur
- fór í atvinnuviðtal
- beið eftir niðurstöðum úr atvinnuviðtali
- vann myndir og við héldum áfram að koma okkur fyrir
- strákarnir byrjuðu í skólanum og eru rosa ánægðir
- ég fékk vinnuna
- mér var boðin önnur vinna sem ég var að hafna
- ég byrjaði í nýju vinnunni og það er svaka stuð
- ég byrjaði í blakinu með mínu gamla liði og það er svaka stuð líka
- drengirnir byrjuðu á sundæfingu, fimleikum, píanókennslu og fótbolta
- hver dagur er vel skipulagður og mikið um skutl alla daga
- allt fór á flot í geymslunni, tvisvar
- búið að laga lekann í geymslunni
- fór á fyrsta blakmótið og það gekk bara sæmilega, urðum í 5.- 6. sæti af 12 liðum
- blakþjálfarinn reynir að láta mig slá fastar og fasta í boltann - mig sárvantar meiri vöðva, hvað segið þið um stera!
- búin að fá flensuna, veit ekki hvort það var svínið!!
- skrapp á Selfoss á árshátíð í nýju vinnunni minni
- búin að fá nokkra næturgesti á nýja heimilið í Hafnarfirðinum og þeir hafa unað sér vel í neðri kojunni hans Egils Ara.
- höldum reglulega súpupartý og pizzapartý sem er voða gaman

Læt þetta duga í bili – aldrei að vita nema ég bloggi annað slagið í vetur, svona þegar andinn kemur yfir mig. Góðar stundir.

Júní:
- kláraði lokaverkefnið mitt í WAP
- átti frábærar stundir með gestunum frá Íslandi
- hélt upp á afmæli stóru syss
- útskrifaðist með sæmd frá WAP og var að sjálfsögðu hæst
- skilaði af mér íbúðinni góðu á Pheasant Lane
- kvaddi góða vini í Victoria :'(
- héldum af stað í ferðalagið góða yfir Kanada
- byrjuðum í Vancouver og fengum að sjálfsögðu góðar móttökur í Melfa Lane
- héldum sem leið lá yfir Klettafjöllin
- fundum æðislegan flóamarkað og Inga gat keypt sér einn bolla með undirskál, Brynjar fann sér svarthöfðagrímu og Egill Ari keypti sér 35 ára gamalt Andrésblað
- gistum fyrst í Merrit og svo í Golden
- yndislegt ferðalag, vorum á tveimur fólksbílum og enn er mikil ráðgáta hvernig allt dótið komst í þá
- komum svo til Calgary og áttum frábæra kvöldstund með Önnu og vini hennar á æðislegum veitingastað
- flugum til Winnipeg og fengum góðar móttökur frá Rósalind, Einari og Kristrúnu
- komum okkur fyrir í sumarhúsi Kristrúnar við Winnipegvatn
- skoðuðum söfn í Gimli, í Winnipeg og Selkirk, fórum í kvöldverð til Margrétar í Riverton, skoðuðum Hekla Island í mikilli rigningu, fengum flottar móttökur og skemmtilegan dag með barnakórnum í Árborg, keyrðum eftir kassalegum ferhyrningum, hittum fullt af skemmtilegu fólki og marga sem töluðu íslensku, enduðum þetta svo með kvöldverði hjá Konsúlnum.
- flugum til Ottawa með millilendingu í Toronto
- fengum frábærar móttökur frá Jamie frænku og Cliff
- ókum á heimili þeirra í Québec fylki, rétt hjá Pembroke
- fengum flottan kvöldverð og syndum í Ottawa River

Júlí:
- vorum keyrð til Ottawa til að halda upp á þjóðhátíðardag Kanadamanna 1. júlí
- fórum á skoska sýningu og hittum skosk-íslenskt fólk og fleiri
- hittum einnig systur konsúlfrúarinnar
- í Ottawa voru múgur og margmenni og skemmtilegir götulistamenn alls staðar að úr heiminum út um alla borg
- Carl var með skemmtiatriði sem ég reyndar rétt missti af en Cliff, Inga og Úlfar náðu því
- um kvöldið vorum komum við okkur fyrir á Parliament Hill og fylgdumst með dagskránni sem var sjónvarpað um allt landið
- kvöldið endaði að sjálfsögðu með glæsilegri flugeldasýningu
- fórum í skemmtilegan rútuferð daginn eftir og ég reyndi eftir megni að þýða "sightseeing" ræðuna fyrir mömmu og pabba, gekk ekkert allt of vel þegar farið var mikið ofan í alls konar stjórnardæmi og hvaða kall væri þetta og hitt. Og hvað væri í minningu þessa atburðar og hins...
- fórum á flott safn í Ottawa og svo út á borða á frábærum stað, rosa flott hlaðborð og Carl kom líka
- vöknuðum um miðja nótt til að taka lest til Niagara Falls
- þægilegur og skemmtilegur ferðamáti og ferðin tók aðeins 7 tíma og við skiptum um lest í Toronto
- komum okkur fyrir á hótelinu okkar með útsýni yfir fossana
- fórum í gönguferð, tókum myndir og fórum m.a. undir fossana
- pöntuðum okkur pizzu um kvöldið og nutum útsýnisins - fylgdumst svo með flugeldasýningu yfir fossunum
- Jamie og Cliff sóttu okkur svo um hádegi daginn eftir
- við komum við á Vínekru á leið okkar til Torronto
- komum líka við í Costco.... og keyptu tvo flakkara eða svo
- komum okkur fyrir á flugvallarhótelinu í Toronto og fórum svo í bæinn að skoða CN tower
- við tókum fyrst flugvallarrútuna upp á flugvöll, strætó þaðan niður á lestarstöð, þar tókum við lest númer 1 og eftir töluverðan tíma skiptum við í lest númer 2 og enduðum á aðallestarstöðinni í miðborg Toronto, rétt hjá turninum.
- föttuðum að við höfðum verið þarna áður, þegar við skiptum um lest á leið okkar til Niagara Falls
- fórum í mjög svo langa röð til að komast upp í turninn
- nutum útsýnisins yfir borgina og keytpum dýrasta kók ferðarinnar
- þeir hugrökku stóðu stigu út á glergólfið og þeir allra hugrökkustu lögðust út á vírinn.... sem reyndar var stranglega bannað
- fórum á notalegan veitingastað sem sérhæfði sig í rifjasteikum
- áttum notalegan lokadag í Kanada, sumir við sundlaugarbakka á hótelinu aðrir fóru í búðir
- kvöddum Jamie og Cliff með söknuði á flugvellinum í Toronto
- flugum til Íslands og svalt loftið tók á móti okkur

Mikið hefur nú verið gaman hjá okkur síðan gestirnir komu. Strax fyrsta daginn voru þeir drifnir í skoðunaferð um bæinn. Vegna tímamismunar voru þau þó orðin þreytt ansi snemma. Rétt náðu að halda sér vakandi fram yfir átta og fóru svo að hátta. Að því tilefni ákváðum við heimilisfólkið að reyna að snúa sólarhringnum aðeins við líka - fara að sofa svona um 22 í stað 2. Gekk ágætlega en það var samt svakalega erfitt að vakna klukkan átta morguninn eftir en þá höfðu gestirnir verið á fótum í 2-3 tíma!!

En að léttara hjali. Klukkan ellefu þrjátíu að staðartíma verður brunað út á flugvöll að ná í hina tignu gesti sem munu nú loksins heiðra okkur með nærveru sinni. Gleði, gleði, gleði. 

Mamma mín á afmæli í dag. Sú hefur nú aldeilis lifað tímanna tvenna enda fædd um miðbik síðustu aldar. En hún er eldhress og situr sjaldnast auðum höndum. Heyrði í henni í dag og sagði hún að næsta mál á dagskrá væri að þrífa fjáhúsin á Vaðbrekku!! Innilega til hamingju með daginn elsku mamma. 

Í dag er hún Guðrún Sigurðardóttir frænka mín að útskrifast sem stúdent frá Framhaldsskólanum á Húsavík. Hún er að klára námið á þremur árum en hefur unnið mikið með þar sem hún hefur mestann tímann staðið á eigin fótum fjarri foreldrahúsum. 

Lífið er yndislegt hér á eyjunni þessa dagana. Í dag var 20 stiga hiti og virkilega notalegt. Ég notaði daginn til að taka myndir í action sport verkefnið mitt, þannig að nú á efni í þau síðustu tvö verkefni sem ég á eftir að skila fyrir utan lokaverkefnið. Endaði á því að nota bara blessuð börnin sem fyrirsætur enn einu sinni. Haldiði að drengirnir séu orðnir nokkuð þreyttir á þessu! Svo fór Egill reyndar líka í myndatöku í dag hjá skólasystur minni, en þeir bræður hafa verið fengnir til að pósa fyrir nokkra bekkjarfélaga mína í vetur. 

Kominn miður maí eins og hendi væri veifað. Útlegð fjölskyldunnar er senn á enda. Á þriðjudaginn var síðasti formlegi skóladagurinn. Nú er bara að klára verkefni og koma öllu frá sér. Fjallið virðist óendanlegt en ég klíf það hægt og sígandi. Það var ekki til að bæta ástandið að ég var með flensu í þessari viku sem ég mátti að sjálfsögðu ekkert vera að því að vera með. Harkaði mér áfram á hálfu batteríi, fór í skólann, í myndatökur, með strákana í sund og vann myndir í tölvunni fram á nótt. En mér er að batna, leið svo miklu betur í dag.

Öll síðasta vika fór í Multi Media námskeið og unnum við þrjár saman í hóp að miklu meistarastykki. Mun fara á spjöld kvikmyndasögunnar!! Ég skelli því kannski á netið þegar ég kemst í það næstu daga. Á laugardag var svo kosningavakan mikla. Aldrei fyrr hef ég fylgst með frá fyrstu tölum og þar til síðustu tölur voru lesnar upp. En maður var bara orðinn ansi þreyttur kl. 2.00 þegar Inga Þöll kom með lokaskammtinn í mínu kjördæmi. Ég er aftur orðin sátt við það sem ég kaus og hætt við að vilja breyta um skoðun. Nú er bara að bíða og vona að fari eitthvað að viti að gerast á Alþingi og liðið hætti að haga sér eins og smákrakkar. 

Áttum rosa gott páskafrí og fórum í skemmtilegt ferðalag á meginlandið. Gaman að koma til Whistler og sjá svæðið sem Vetrarólympíuleikarnir verða haldnir árið 2010 og til Seattle, heimabæ Gray's Anatomy Ég var að setja inn fyrsta skammt af myndum úr ferðalaginu á barnalandið þannig að það er nóg að skoða fyrir áhugasama. 

Þessi vika leið eins og hendi væri veifað. Fínasta vika ekki síst fyrir þær sakir að loksins kom vorið. Það fór að hlýna all hressilega á föstudaginn og blíðan er búin að leika við okkur eyjaskeggja um helgina. Á laugardaginn fórum við með strákana að vatni einu og lékum okkur í sandfjörunni sem þar er. Þetta vatn er bara rétt hjá okkur en við erum nýbúin að uppgötva það. Það er reyndar með þennan útivistastað eins og marga aðra hér í bæ að þar er fólk í hrönnum að viðra hundana sína. Maður mátti bara passa sig á að verða ekki undir of og tíðum, svo mikill var hamagangurinn. 

Mikið var nú gott að hvíla sig eftir langar og strangar tískuvikur. Á morgun byrjar svo ballið aftur en þá er fyrsti tíminn í Brúðkaupsljósmyndun. Það er ekki seinna vænna þar sem nú þegar er búið að ráða mig í tvær slíkar myndatökur í sumar

Tískuljósmyndakúrsinn klárast á morgun með krítík hjá öllum hópnum. Á hverjum degi höfum við fengið svona "one on one" krítík með kennaranum en í dag þurfti ég svo að velja 3 myndir af þeim 800 sem ég hef tekið á undanförnum tveimur vikum. Ætla mætti að það væri mikið að velja úr, en tískuljósmyndun er snúnari en maður heldur. Ekki má skyggja á tískuna, þ.e. fötin, skartgripi og þess háttar. Limir, þ.e. hendur og fætur geta ekki verið hvernig sem er. Komst að því að lokum að ef maður getur ekki stillt höndum og fótum rétt þá er gott að klippa það bara af myndinni eða setja hendurnar fyrir aftan bak á módelunum!! Hálsinn er mjög mikilvægur þegar kemur að tísku og svo framvegis. Þannig að það var oftast hægt að finna eitthvað að hverri einustu mynd!!